پڕۆژەی ئازار تایبه‌ت به‌ ( شێنێ جبار حمەامین) له‌ شاری سلێمانی


پڕۆژەی ئازار
 ناهاوسەنگیەكانی دونیا دەبنە هۆی ناسازیی و ماندووبوون لە مرۆڤدا، هەر ناڕێكیەك دەتوانێت كێشە بێت بۆ مرۆڤێك و سەرقاڵی بكات و وزەی لێ بەرێت، من بەمە دەڵێم ئازار. ئازاری من و ئازاری تۆ، 
بەرهەمهێنانی ئەم پڕۆژەیە؛لە دوتوێی بەرهەمێكی بەرجەستەبوی ئینستلەیشن دا، هەوڵێكە بۆ پیشاندانی ئازار لە دیدی هونەریی منەوە. 
من لە پڕۆسەی دروستكردنی ئەم پڕۆژەیەدا ئازاری نوێم تاقیكردۆتەوە، ئازار فۆڕمی بە كارەهونەریەكە بەخشی و كارەكانیش لە پڕۆسێسی دروستكردندا ئازاریان بەركەوتووە؛ تا گەیشتن بە كاتی نمایش، تابلۆكە لەچەند لایەكەوە شكاوە و پیس بووە، كاتێك هەوڵی پاككردنەوە و چاككردنەوەیم داوە دووبارە بەشێوەیەكی تر زیانی بەركەوتووە . 
یەكەكانی پێكهاتەی ئەم كارە ئینستڵەیشنە لەگەڵ ئەوەی دروستكردنیان بۆخۆی كارێكی قورس و تەكنیكێكی نامۆ بوو؛ بەهەمان شێوە تووشی شكان بوونەتەوە. هەروەها لەڕۆژانی نمایشیشدا مەترسی ئەوەیان لەسەر هەیە زیانیان بەربكەوێت. كەواتە تەنانەت خودی بەرهەمە هونەریەكەش لە مەترسی بەركەوتنی ئازاردایە.
 لەسەرەتای كاركردندا هیچ ئایدیایەكم نەبوو كە لە تابلۆكەدا چی دەكێشم، تەنها دەمویست لەسەر ڕووبەرێكی گەورە بە ڕەنگی شین و تۆنەكانی هێڵكاریەك بكەم، ئەمە تاكە شتێك بوو كە دەمزانی و دەمویست بیكەم، نیگاركێشانەكە بە ڕاكێشانی هێڵی درێژ دەستی پێكرد كە وەك شەڕكردنێك هێزی توڕەیی خۆمم دەخستە سەر تابلۆكە، لێرەدا دەمویست ئازارەكانی ناوەوەی خۆم بنوسمەوە، بەڵام هیچ فۆڕمێكم نەبوو كەبەهۆیەوە گوزارشتی لێبكەم. دوای كێشانی كۆمەڵێك هێڵ بینیم چەند فۆڕمێكی شێوە چەماوەیی دروستبووە، پاشان كاتێك وردە وردە ئارام بوومەوە؛ فۆڕمەكەم بەتەواوی ڕێكخست و دەستمكرد بە ووردەكاری تێیدا. بینیم ئەمە هەڵچوونەكانمە لەسەر تابلۆیەك، بەڵام بڕیارمدا كاری تێدا بكەم و ڕەنگ و تەكنیك و ماددەی جیاوازی تیادا بەكاربهێنم، كە هەندێكیان بە مەبەست و هەندێكی تریان بێ مەبەست دانراون. من لەو بڕوایەدام كە مرۆڤ ناتوانێ، یان نایەوێ دەست لە هەموو ئەو ناڕێكی و ناهاوسەنگیانە هەڵگرێت كە ئازاری دەدات، و هەندێك ئازاریش لەلای خۆشەویستن و چێژی لێ دەبینێت ! جگە لەوەی مرۆڤەكان هەندێك كات بۆ شاردنەوەی ئازارەكانیان ماسك بۆ خۆیان دروست دەكەن، یان ئازارەكانیان دەڕازێننەوە، یان دەیلاوێننەوە؛ بۆیە من بڕیارمدا بە نەخشاندنی تابلۆكە. هەرچەندە ناوەڕۆكی كارەكە باس لە ئازارەكانی من بكات، بەڵام ئەمە هاوكات دەبێتە خاڵێكی ئیستاتیكی تابلۆكە، ئەمەش ئەو دیوەی كاری هونەریە كە بەر بینەر دەكەوێت، چونكە پەیوەندی نێوان بینەر و كاری هونەریی بۆ من زۆر گرنگە، بۆیە بڕیارمدا فۆڕمەكانی ناو تابلۆكە بهێنمە دەرەوە و لەشێوەی (ئینستڵەیشن)دا بەرجەستەی بكەم، تا بینەر هاوبەش بێت لە كۆنسێپتەكەدا و ڕاستەوخۆتر بەریەككەوتن دروست ببێت، هەر لەبەرئەوەش ئەم دوو كارە؛ دوو بەشی تەواو پەیوەستن بەیەكەوە. شێوەی ڕێكخستنی یەكەكانی ئەم ئینستڵەیشنە بەجۆرێكە، كاتێك بینەر بەناویدا تێ بپەڕێت؛ هەست بە مەترسی بكات و ناچار بێت خۆی لەو نوكە تیژانە لابدات كە پێكهاتەی كارەكە لەخۆی گرتوە. چونە ناوەوەی بینەر بۆ ناو سنوری كارە ئینستڵەیشنەكە لەپێناو بینینی تابلۆیەك؛ لەخۆیدا پڕۆسێسی پەسەندكردنی ئازارێكە، كە تەنانەت دڵنیانیت چێژ لە ئەنجامەكەی وەردەگری یان نا؟! لەم نمایشەدا تابلۆ گەر جارێك بەرهەمێكی هونەری بێت، جارێكیش میدیایە كە تۆ لەوێوە چیرۆكی كەسێكی تری تیا دەخوێنیتەوە؛ كە لای خۆی ئازارە، بەڵام مەرج نیە تۆی بینەر هەست بەو ئازارە بكەیت! ئێستا ئێمە بەبەردەوامی لە میدیاوە ئازارەكانی ئەوانی دیمان پیشان دەدرێت، بەڵام هەمووكات نا هەژێین و هەست بە ئازار ناكەین، بەڵكو هەندێك كات بەهۆی تەكنیك و شێوەی ڕێكخستنەوە ؛هەست بە جوانیش دەكەین!
كوردبوون بۆ من بەئازارە، هونەرمەندبوون و ئافرەتبوونیش بەتایبەت لە ووڵاتێكی ڕۆژهەڵاتیدا ئازارێكی گەورەترە، حیجاب بوون و پەیوەستی ئاینی بەهەمان شێوە، هۆكاری بەشێك لە ئازارەكانی منە، من لێرە چیرۆكی خۆم دەگێڕمەوە؛ كە چۆن ئازار لەسەرەوە بۆ خوارەوە دادەبەزێ. یەكێكی تر لە ڕەهەندەكانی ئازار كە ئەم پڕۆژەیە لەخۆی گرتوە؛ مانەوەی شوێنەواری ئازارە، كە هەندێك برینی ئەو ئازارانە بەشێوەیەك كار لە مرۆڤ دەكەن، ساڕێژبوونیان دەبێتە مەحاڵ و كاتێكیش هەستی ئازارەكە نامێنێ، كاریگەریی و تراوماكەی هەر بەجێدەمێنێ. بەم شێوەیە لەگەڵ تێپەڕینی زەمەنێكی ئازاراوی ئێمە بەردەوام لە گۆڕانداین، لەگەڵ هەر ئازارێكی تازە دەبینە شتێك كە پێشتر نەبووین.
كارەكانی ئەم پڕۆژەیە پێكهاتووە لە دوو بەش تابلۆیەك بە قەبارەی ٢٢٠ /٢٤٠سم ،مادەی تێكەڵ لەسەر (ئێم.دی.ئێف)
ئینستڵەیشنێك پێكهاتووە لە ١٨ یەكەی شێوە لولەیی قەبارە جیاواز كە لە تەپەدۆرو (ئێم.دی.ئێف) دروست كراون
وێنەكانی پڕۆژەی ئازار
Related Posts Plugin for WordPress, Blogger...